Ji’a Guyyaa Fakkaatu

Ji’a Guyyaa Fakkaatu

Ji’a goobana bahe kan guyyaa fakkaate

Karoora hujii qabaa yoo boruun bari’ee

Aninuu boru hin eegnee karoora jijjiiree

Goobanni goobanee ifaan na badhaasee

Maal na badhaase adaa na gowwoomsee!

Midhaan narraa gogee yaadaan ana hodhee

Fichatti[1] ka’ee fiigee haamtuu koo fudhaadhee

Adoo laddee[2] hin haaminuu quba ifirraa ciree

Karoora isa boruu ji’atti dabarsee

Midhaan gogee gahe duuba aansisiisee

Dogongora kiyyaan horii nyaachisiisee.

Adoo hujii hin hujin turtiin naaf ji’umaa

Wadhakkaan badullee wodhakkaan callumaa[3]

Gaabbii maan godhanii garaan na raafamaa

Abbayyoon na gorse turee kan dide anumaa

Osoo ji’atuu adaa lafti halkanumaa.

♣♣♣♣♣

---

[1] Fichaa=maasii,oyruu jechuudha

[2] Laddee=nadoo midhaanii(qabaa harkaa midhaan akka xaafii garbuu fi qamadii faa) yeroo maamanu

[3] Calla=callaa midhaanii ykn miidhaan qulqullaa’e