Qeerramsaa eegee hin qabanu, qabanu gadi hindhiisanu:Warraaqsaa jalqabdee yoo dhiiste of ajjeeste jechuudha (Marxism Theory).

Qeeramsaa eegee hin qabanu,  qabanu gadi hin dhiisanu! Kun mammaaksa Oromooti. Aaki jedhan waa tufanii; mammaakan immoo waa himan. Yaa Oromoo! falmii jalqabde kana addaan hin kutin; yoo addaan kutte, nyaatamte. Nama nyaataa kan ta’e, mootummaan wayyaannee tokko tokkoon guuree si qala. Fincila uummataa kanaan guyyaa tokkofis ta’u, iddoon tokkoofi tokko bilisoomanii alabaan  irratti mirmirfamuunsaa  miidiyaalee hasasaa gara garaarraa argineerra. Amma fincilli kun yoo dhaabate, akkuma mootummaan yeroo ammaa midiidiyaasaatiin farreen nageenyaattu kana raawwate jedhaa jirutti, kana booda Oromoota hundaa,  farra nageenyaa godhee tokko tokkoon fixa. Taa’anii du’uurra falmachaa du’u wayya. Hayyuun beekaman Kaarl Maark  yookiin Maarkizim tiyooriin akka jedhu, Warraasa yoo jalqabdee dhiiste, of ajjeeste jechuudha jedha. Marree Tiyooriin Oromoolle, qeeramsa eegee hin qabin, qabdu gad hin dhiisin jedhaa mitiiree? Qeerramsa eegee yoo qabde, ajjeessuu qabda; yoo gadi dhiiste si nyaata waan ta’eef.

Gama biraatiin, gorsaa lallabaa wangeelaa  nama  Waaqee Ji’oo Garbii jedhamu, ergaa isaanii karaa ‘You Tube’ tiin ( https://www.youtube.com/watch?v=aZR4h9Xl_mo#t=15 )  haala amma Oromoon ajjeefamaa fi hidhamaa jiru kana ilaalchisee dhaamsa isaan dabarsanirraa ka’uudhaan,  anis  dhaamsa kana lammii kootiif dabarsuu barbaade.  Ergaan isaanis akka jedhu, waaqni ilmaan nama bilisa godhee uume; garbummaa wajjiin hin uumnee waan ta’eef, namno Oromoo taate, Lubni yookiin Qeessiille, Sheekiillee, Abbaan Gadaalle yeroo kana  Oromoota mirga isaaniitiifi bilisummaa isaaniitiif dhuman bira dhaabachuu akka qaban dhaame. Yoo qabsoon jalqabame kun adda cite,  mootummaan kanaan duuba nama duraan fixe caalaa akka ajjeesuufi akka hidhuu malullee, lallabaan wangeelaa kun osoo hin akeekkachiisnille bira hin dabarre.

Anille hordofaa amantaa Kiristaanaati. Daa’imummaa kiyyaa kaasee amantaadhaan guddadhe. Maqaa kiyyaayyuu mishiinerootatti Daani’eel naan jedhe malee, maqaan koo  kan dhalootaa Saafoyii ture-saafaa lafaa dhaladhe jechuuda. Amma waa’ee koo dubbachuu osoo hin taane, anis kitaaba qulqulluu nama dubbisuufi leenjii kitaaba qulqulluu yeroo tokko tokkotti nama fudhateedha. Dubbuma lallabaa wangeelaa Waaqee deeggaruu fedheedheti. Kitaabaa qulqulluu keessallee iddoon  akka ati mirga keetiif qabsooftuufi garbummaa lammii keetiitti akka garaa hin jabaanne argaasiisu hedduudha. Mee isaan keessaa kitaabilee kakuu(Gondooroo) haareyaa fi Dullacha keessaa iddo tokko tokko haa ilaalluuti. Kitaabaa Seera Bayiisaa(ኦሪት ዘጸአት:Exodus 2:11) irratti akka jedhutti, “guyyoota hedduun dubbatti akkana ta’e; Muuseen guddate. Gara obboleeyyaan isaa dhufe. Rakkinya isaanilleen ilaale; namni Gibxii tokko gosa Muusee kan ta’e Ibiraawicha tokko yoo reebu/dhaanu/rukutu arge.  Aaree mirgaafi bitaa ilaale, namicha lammii muusaa dararaa ture tokko ajjeessee...” jedha. Namoonni  seenaa Muusee kitaaba qulqulluu keessatti dubbisnu ni beekna. Muuseen masaraa mootummaa keessatti guddate; haa ta’u malee,  garbummaan sabasaa isa gube, isaa aarsee. Masaraa mootummaa keessa ta’ee osoo sabnisaa garbummaa keessa jiru taa’ee cooma murachuu hin barbaanne. Sabasaa garbummaa jalaa baasuuf waggoottaan 40 dhama’e. Kanaafuu guyyaa akkanaa kana, namoonni saba Oromoo ta’e, namoota saba keenya garboomsaa jiru wajjiin hiriirtan, muusee Oromoo ta’aa. OPDO Muusee Oromoo ta’i. Loltuu Muusee Oromoo ta’i…..

Kitaabni lammeessoo, Wongeela Luqaas 19:45 irratti akka jedhu, Iyeesuus namoota mana kadhaa keessatti daldala adda addaa gaggeessa turan,  akka mana kadhaa keessaa ari’e dubbata. Mana kadhaa, mana duuriyyee yookiin kashilabbee maaliif gootanii? Jedhaa akka namoota mana kadhaa keessaa basse/ari’e/gusse wangeelli ni dubbata. Dubbiin karaa hamtuun yoo dhufte,  kan cubbuu tokkoo osoo hin qabaatin ilmaan namaatiif du’e, Iyeesuus Kiristoosille aarsitee turte. Kanaafu, ati nama beekumsa xiqqaan nama hundaanuu diinnis obboleessa kan jettu dhaga’i.  Manni haadhaa teeti Oromiyaa yoo dinaan saamamu caldhistee hin ilaalin. Yoo dacheefi qabeenya biyya keenyaa diinni ittii daldalu caldhistee hin ilaalin. Yoo  diinni afaan Oromoo dubbataa,  afaan Oromootiin daldalu caldhistee hin ilaalin. Nama jibbi jechaa hin jiru, mirgaa keetiif falmadhu. Bineensis ciisee hin du’u, hanga danda’etti ofirraa falmata. Waaqni garboomii nama jalatti buli hin jenne.  Ammas irra deebi’ee sitti dhaama; nama   beekumsa xiqaadhaan karaa amantaatiin uummta diina jalatti gaaditu,  ofirra dhaabadhuu of ilaali. Seenaa Muuseetiif seenaa Iyyeesuus mana kadhaa keessaa duuriyyee ari’e kana haala yeroo ammaa Oromiyaan keessa jirtuun wal-qabsiisaa  xiinxilaa.

Dubbiin tun duraanuu raagaan dubbatantee jirti. Kitaaba raaga Daani’eel 11:40-45 irratti mootummoonni abbootii irree fincila uummataatiin akka kufan dubbata. Akka kitaabni qulqulluun kun  mirkaneessee kaa’etti, biyyoota mootummoonni abbaa irree  fincila uummataattiin kufan Gibxii, Liibiyaafi Itoophiyaa jedha. Ajaa’iba! Maarree carraan Gibxiifi Liibiyaa dhumeef; arginee jirra. Kitaabni qulqulluun hin sobu waan ta’eef, kan Itoophiyaalle jalqabamee jiraa waan ta’eef, waaqayyoo akka galmaan geenyu nuu haa gargaaruti; Ameen!!!!! See: http://www.yaadannoogaazexeessaa.blogspot.com  for more information.