Lagaan na hinyaaminaa!

Lagaan na hinyaaminaa!

Lagan na hin yaamina

Gandaan na hin yaamina

Lafaan na hin yaamina

Gosaan na hin yaamina.

Kaloo natti hin jaarina

Godinaan na hin yaamina

Waaqaafi lafa sodaadhaa

Gujii naan hin jedhina

Boorana naan hin jedhina

Arsii-Baalee Shawaa

Wallagga-Jimmaa-Iluu

Karrayyuu-Walloo-Raayyaa

Akkasuma Ituu-Humbanna

Akkanaan na hin yaamina.

Oromoo naan jedha

An dhala Oromooti

Ilma abbaa Gadaati

Lafaan wal qooduun

Gosaan wal qooduun

Aadaa keennaa motii

Orma nu barsiisee

Ormille tolaaf motii

Bittaaf nu barsiisee

Tooftaa qooddaafi bittaa

Oromiyaarratti diriirsee

Woggaa dhibba tokkoof

Duubatti nu deebise.

Waaqaafi lafa sodaadhaa

Godinaan na hin qoodina

Lafaan na hin qoodina

An dhala Oromootii

Obboleessa keessanii

Ilma abbaa Gadaati

Ofitti na qabadhaa

Oromoo naan jedhaati.

Ormi gosa hin beettuu

Ormi lafa hin beettuu

Oromoo sodaatti

Walumaa qabdeetii

Garuu,

Addan nu baasuuf

Halkanii fi guyyaan hojjatti

Lafuma abbaa tokkoorratti

Daangaa qopheessitee

Irra wal-fixaa jetti

Gaafa isin wal-fixxanu

Gaafa isin wal-qooddanu

Umrii dheereffadha jetti.

Wallaala maal godhuu

Wallaalaa maal godhuu

Ilmaan abbaa tokkoo

Diinaan gowwoonfamtee

Ajjeeftee wal-dibattee

Dhiigaan wal-balleessitee

Waaqa, kanaaf ta’aa laati

Kan harka diinaatti nu kennitee!

Yaa Oromoo,

Araara waaqa gaafadhaa

Margaa jiidhaa qabadhaa

Wal-jibbuu kakadhaa

Lafaan na hinyaaminaa

Gosaan na hinyaaminaa.

An dhala Oromooti

Obboleessa keessanii

Ilma abbaa Gadaatii.

Humni gaafa qaraa

Tokkummaan inni duraa

Gaafa fardaan lollu

Diina ariinee gussinee

Gaafa boollaatti naqnuu

Gaafa holqatti naqnu

Dachee Oromiyaa

Bal’isnee qabannee

Gaafa bilisa baasnu

Humna   san maal gooneeti,

kan harka diinaatti kufnuu?

Gubadhee boba’ee

Jiraachuu dadhabee

Maqaa Oromummaatiin

Gaazii ibidda biraa ta’ee

Ormi dur nu sodaattu

Hanga keenna argitee

Soda keennaa dhiiftee

Nurratti mammaakutti kaatee

Akkana nuun jettee:

“Baay’inni  Oromootii fi

Baajenni gammoojjii

Bu’aa hin qabu” jette!?

Yaa Oromoo lagaan wal- hin yaamima

Lafaan wal-hin yaamina

Walirraa baqattanii

Lagaan wal-qooddanii

Adda addaan yaatanii

Yaatamuuf of hin mijeessina.

Midhaani kiiloo digdamaa

Digdamaan qoodamnee

Digdamaan yoo daaksifanne

Kamtuu baabura kassa hafee

Kamtuu baabura keessaa bahaa?

Garuu,

Adoo[1] wal-jaalannee

Nuusa tokkotti naqannee

Bakka tokkotti daaksifannee

Walumaan nyaannee dhugnee

Silaa quufnee bulle

Ahaa…

Yaa Oromoo addaan na hin baasinaa

Lagaan na hin yaaminaa

An dhala keessanii

Ilma abbaa Gadaati.

Yaa Oromoo saba koo

Osoo karaa deemuu mixii yaa’u argee

Lammii koo yaadadhee

Mixii beektuumitiree?

Mootii addunyaa kanaa

Mootii bineensotaa, mootii iibbiisotaa

Qaamnisaa bar hin jiruu,

Kan isa mootomse kunoo tokkummaadha!

♣♣♣♣♣
Sadaasaa, 2008 Adaama.

---

[1] Adoo = osoo, utuu, od jechuudha