Harkuu

Harkuu[1]

Gurraan hamatamee

Maseeneen komatamee

Tultuu[2] ilaallamee

Ogessaan bakkifamee[3]

Kormaan barbaadamee

Kophasaa tikfamee.

Haati gurraalle,

Aannan gurraa dharraatee

Gurraa kunuunfattee

Rima’uu isaa argitee

Qum’aadattee[4] seeqattee

Garaa isi’iitti gammadattee

Haada itti dhowattee

Kaloo keessatti hidhattee

Aannan isaa gojomaatee[5]

Okeya itti haamattee

Ammaa fi ammaa lallattee

Ollaa fi fira godhattee

Gooree ijaarrattee

Gaadii qopheeffattee

Okolee qoraafattee

Obsumaan eegattee

Jiinni kudhan guutee

Gurraalle laa dhalte.

Maa jettee madhatee

Watii arraabbattee

Haati gurraalle,

Sillasaa[6] elmattee

Qodaa[7] qoraafattee

Naqattee kuufattee

Kuufattee raafattee

Addeenna[8] balleeffatte

Gurraan cululuqxee

Maal godhan garuu,

Gaafuma cululuqaa,

Waatiin gurraa duute

Qananii irraa fuute

Haati gurraa naatee

Dhaggi dhabii jettee

Sanyoo isiitii himte

Sanyoo[9] haadha gurraa,

Malasaanii malanii

Aanan hindhabnu jedhanii

Harkuu qaabatanii

Gogaafi foon addaan baasanii

Bilawa malee harkaan qalanii

Waati quncisanii

Huura itti duuchanii

Aduu keessa kaayanii

Gogaa goggossanii

Waatii fakkeessanii

Boolee[10] fi soogda dibanii

Gurraa jala kaa’anii

Gurraa gowwoomsanii

Elmachuuf yaalanii.

Gurraalle shakkitee

Watii isii suuftee

Foolee dhalaa fuutee

Dhimmicha mirkaneeffattee

Hifattee ficiqattee

Gaadii ifirraaa hiikattee

Waatii kajeellattee

Kaloo keessaa baatee

Korma barbaadatte

♣♣♣♣♣

---

[1] Harkuu =sa’a waatiin jalaa duutee toleedhaan elmamu. Toleen sobilee jabbii fakkaattu.

[2] Tultuu= yaala sa’aa dhaluu dideef godhamu. Yaalli kun qaama hormaataa irraa waan kutamutti jira. Kun Oromoo Arsii biratti Gurdaa jedhama. Gujiitti jechi gurdaa jedhamu ammoo teepha dur mudhitti hidhamu jedhuudha.

[3] Bakkisuu= yaala sa’a dhala dideef godhamu. Yaalli kunille afaaniin afuufuudhaan taasifama.

[4] Qumaadate= seeqee, kolfuu jalqabe, gammade jechuudha.

[5] Gojoma’uu =dharra’uu, kejeeluu, halchuu, joljoluu

[6] Silla =silga (aannan yeroo jalqaba saanni ykn goromsi dhalu elmamu)

[7] Qodaa =qabee aannanii( mi’a aannan itti naqan ykn kuusan)

[8] Addeenna= Dhaba dhadhaarraan kan ka’e shankallaa’anii daaraa fakkaachuu

[9] Sanyoo =gaarayyuu, jaalaa fi jaaltoo

[10] Boolee =biyyoo albuuda mi’aawaa of keessaa qabdu kan loon arraabanu (boojji)